Manu Smriti-The Great Vedic Kosh

Language

HINDI
ENGLISH
MARATHEE
GUJARATI
TELGU
ODIYA

QUICK LINKS

HOME >> CHAPTER HEADING >> SHLOK

3. समावर्तन, विवाह एवं पञ्चयज्ञविधान-विधान

अव्रतैर्यद्द्विजैर्भुक्तं परिवेत्रादिभिस्तथा ।अपाङ्क्तेयैर्यदन्यैश्च तद्वै रक्षांसि भुञ्जते 3/170

दाराग्निहोत्रसंयोगं कुरुते योऽग्रजे स्थिते ।परिवेत्ता स विज्ञेयः परिवित्तिस्तु पूर्वजः 3/171

परिवित्तिः परिवेत्ता यया च परिविद्यते ।सर्वे ते नरकं यान्ति दातृयाजकपञ्चमाः 3/172

भ्रातुर्मृतस्य भार्यायां योऽनुरज्येत कामतः ।धर्मेणापि नियुक्तायां स ज्ञेयो दिधिषूपतिः 3/173

परदारेषु जायेते द्वौ सुतौ कुण्डगोलकौ ।पत्यौ जीवति कुण्डः स्यान्मृते भर्तरि गोलकः 3/174

तौ तु जातौ परक्षेत्रे प्राणिनौ प्रेत्य चेह च ।दत्तानि हव्यकव्यानि नाशयन्ति प्रदायिनाम् 3/175

अपाङ्क्त्यो यावतः पङ्क्त्यान्भुञ्जानाननुपश्यति ।तावतां न फलं तत्र दाता प्राप्नोति बालिशः 3/176

वीक्ष्यान्धो नवतेः काणः षष्टेः श्वित्री शतस्य तु ।पापरोगी सहस्रस्य दातुर्नाशयते फलम् 3/177

यावतः संस्पृशेदङ्गैर्ब्राह्मणाञ् शूद्रयाजकः ।तावतां न भवेद्दातुः फलं दानस्य पौर्तिकम् 3/178

वेदविच्चापि विप्रोऽस्य लोभात्कृत्वा प्रतिग्रहम् ।विनाशं व्रजति क्षिप्रं आमपात्रं इवाम्भसि 3/179

सोमविक्रयिणे विष्ठा भिषजे पूयशोणितम् ।नष्टं देवलके दत्तं अप्रतिष्ठं तु वार्धुषौ 3/180

यत्तु वाणिजके दत्तं नेह नामुत्र तद्भवेत् ।भस्मनीव हुतं द्रव्यं तथा पौनर्भवे द्विजे 3/181

इतरेषु त्वपाङ्क्त्येषु यथोद्दिष्टेष्वसाधुषु ।मेदोऽसृङ्मांसमज्जास्थि वदन्त्यन्नं मनीषिणः 3/182